Donostiak egingo dio harrera Manifestaren 5. edizioari

International Foundation Manifesta-k (IFM) atseginez jakinarazten du Euskal Herriko Donostia hiria 2004an Manifestaren 5. edizioari harrera egiteko ofizialki aukeratu dutela. Sinaduraren ekitaldi ofiziala 2002ko maiatzaren 7an izango da, Kursaaleko Auditorioan, Donostian.

Datozen bi urteetan Manifesta 5 Donostian garatzeko IFMrekin elkarlanean arituko diren alde ofizialak Donostiako Udala, Gipuzkoako Foru Aldundia eta Eusko Jaurlaritza dira.

Manifesta, Arte Garaikidearen Europako Bienala, erakusketa ibiltaria da, Europako herrialde desberdinetako artisten eta publikoaren arteko elkarrizketa bultzatzea helburutzat duena. Manifestak bi urtean behin aldatzen du bere kokalekua eta plataforma bat eskaintzen du ingurune desberdinetako artista gazteentzat. Edizio bakoitzak eremu sozial, politiko, ekonomiko eta kulturalaren egoera zehatzei eta aldakorrei erantzuteko aukera eskaintzen du. Aldi berean, nazioarteko komisario gazteei, bertako eta kanpoko produkzio taldeekin lankidetzan aritzen direnei alegia, lan egiteko eta publikoarekin komunikatzeko metodoekin esperimentatzeko aukera eskaintzen die. Ibiltaria denez, Manifestak beti aztertu behar izaten ditu errealitate berriak, eta beti ezarri behar izaten ditu kide berriekin elkarrizketak. Bienal hau sare ireki bat da eta Europa osoko artisten eta profesionalen arteko lankidetzak eta komunikazioak duten garrantzia azpimarratzen du bereziki.

Azken sei urteotan, bienal ibiltari hau bere sorlekutik beste leku batzuetara aldatu da, alegia Rotterdametik (1996), Luxenburgora (1998), Ljubljanara (2000) eta, aurten, Frankfurt am Main-era; izan ere, hiri horretan emango zaio hasiera laugarren erakusketa bienalari maiatzaren 24an. Bere bizitza laburrean, Manifestak publiko berri bati aurkeztu dio Europa osoko praktika artistiko garaikidea, eta 200 artistari eta 15 kontserbatzaileri baino gehiagori instituzio eta pertsona anitzekin lankidetzan aritzeko aukera eskaini die, esperimentazio eta elkarrekiko errespetuzko giroan.

Donostia bertako egoera sozio-politiko biziagatik eta maila guztietan gero eta azpiegitura kultural eta instituzional sendoagoa izateagatik aukeratu dute. Datorren urteotarako hiriak duen helburuetako bat hauxe da, arte plastikoei eta interpretazio arteei laguntza handiagoa eskaintzea, aspalditik musikarekin (bereziki jazzarekin) hartua duen konpromisora egokitu nahian, baita bertan ospatzen den Nazioarteko Zinemaldiari ere, aurten 50. urte bete dituenean. Donostia identitate sakona eta alienazio sozialaren alternatiba gisa politika kultural koherenteak garatzeko jarrera tinkoa duen eskualde batean dago. Hiriko eta Euskal Herriko garrantzizko alde guztiek adierazi dute Manifesta 5 bienalari laguntzeko prest daudela, gizarte ireki batean eta parekatutako balore demokratikoetan duten sinesmena sendotuz. Bere aldetik, IFM harrituta geratu da komunitatearen maila guztietatik jaso duen laguntza handiarekin baita eskualdeak duen bizitasun handiarekin ere, hiri garrantzitsuak barne hartzen dituena, alegia Bilbo eta Gasteiz, Euskal Herriko hiriburua. Donostia Europako hegoaldean egotea garrantzi handiko faktorea da IFMk planteatu duen helburu estrategikoa lortzeko, estaldura geografiko orekatua eta epe luzerakoa lortzekoa, eta betiere bere jardueraren alderdi guztiak kontuan hartuta (kokapena, zuzendaritza batzordea, komisarioen taldeak eta ordezkaritza artistikoa).
Ekonomiari eta antolamenduari dagokienez nolabaiteko egonkortasuna lortu duela ikusita, International Foundation Manifesta-k bere oraingo eginkizuna betetzeko modu berriak landuko ditu, sare ireki baten muina eta ideia eta lotura artistiko berriak probatzeko plataforma den aldetik. Elkarrekintzan eta diziplina arteko ikerketan erakutsi duen interes estrategikoaren ondorioz, bi urteko erakusketen oinarrizko programarekin lotura estua duten ekimenak sortu dira, ondokoak barne direla: hausnarketa kritikoei buruz laster argitaratuko den liburua, seihilabetekari bat kaleratzea, artxibo digital bat sortzea eta profesional gazteentzako iraupen luzea izango duten nazioarteko eztabaidarako foro eta tailer batzuk inauguratzea. Ideia horiekin eta beste batzuekin, IFMk oinarri sendo bat sortu nahi du, bere egitura iraunkorrari dagozkion alderdi sendoetatik abiatuta, jakin baitaki aldaketa-prozesu integrala antolatuz eta kontrolatuz bakarrik iraun dezakeela.

International Foundation Manifesta-ren eta zuzendaritza batzordeko kideen izenean:

Henry Meyric Hughes (Lehendakaria), Francesco Bonami, Chris Dercon, Martin Fritz, Maaretta Jaukkuri, Kasper König, Vicente Todoli, Vasif Kortun, Hans-Ulrich Obrist, Barbara Vanderlinden eta Igor Zabel.

International Foundation Manifestak Europako Batzordearen 2000ko Kultur Programaren dirulaguntza jaso du.

Total Identity, Amsterdamen (Holanda) egoitza duena, IFMren Web eta diseinu grafikoko jarduera guztiak babesten ari da.

European Biennial of Contemporary Art
PO Box 71222 o Nl. - 1008 DE Amsterdam o Telefonoa 31 20 6721435 o Fax 31 20 4700073
secretariat@manifesta.org
www.manifesta.org
Merkataritza Ganbara 411 58120 o ABN/AMOR 57 03 65 902